SMURNA KOHHRAN

THU PUAN 2:9-10
I hrehawmzia te, i pachhiatzia te (nimahsela, i hausa si a), Juda tak ni lova, Setana inkhâwmna inho ni zâwk sia, Juda intihoten an sawichhiat dân che ka hria. I tuar tûrte hi hlau suh; ngai teh, fiaha in awm theih nân Diabola chuan in zînga mi ṭhenkhat tân inah a khung dâwn che u a ni; tin, ni sâwm hrehawm in tuar ang. Thih thlengin rinawmin lo awm rawh; tichuan, nunna lallukhum ka pe ang che.

Smurna hi khawpui mâwi tak, B.C. 1000 vêla an din tawh a ni a. Juda tamna khua a ni a. Tunah chuan Smurna chu Izmit tih a ni tawh. Turkey rama khaw lian ber a ni.

Smurna Kohhran hian dem a hlawh ve lo. He lehkha thawn a nih lai hian tihduhdah an lo tuar fe tawh a, nasa lehzualin rei lo têah an tuar leh dâwn a. Chumi hunah pawh chuan Lal Isua hming ṭan a, thih thlenga rinawm taka tuar ngam tûrin a fuih a. Chutianga a tawrh ngam chuan lallukhum khumtîrin an awm dâwn a ni. Lal Isua hnung kan zuinaah hian tih tawh a chhuan ngawt theih loh. “Keima hming avângin mi zawng zawng huat in ni ang; nimahsela, a tâwp thlenga tuar peih apiang chu, chu mi ngei chu chhandamin a awm ang,” Lal Isuan a ti a ni (Mat. 10:32).