LÂWM THU
PHILIPPI 4:6
Engah mah mangang suh u; engkimah ṭawngṭai leh dîlin, lâwm thu hril tel zêlin, in duhnate chu Pathian hnênah hriattîrin awm zâwk rawh se.
Thu dang aia dawnsawn nuam kan tih fo țhin chu lawm thu sawina țawngkam hi a ni. Lawm thu sawi chungchâng hi kan Bible-ah pawh vawi 80 zet târlan a ni a. Sam-ah leh Tirhkoh Paula lehkhathawnahte a lang tam zual. Levia hovin tuktin leh tlaitina an hnathawh tur pawimawh tak tak zîngah pawh lawm thu sawi hi lo zuk tel ve reng a maw le! (I Chro. 23:30). Kan Lal Isua pawh khan lawm thu sawi hi a ngai pawimawh hle. Phâr sâwm a tihdam zînga pakhat chauhvin lawm thu a hnêna a rawn sawi khân, “Pakuate kha khawiah nge?” tiin a zâwt hial a ni (Lk. 17:11-18).
Kan duh anga thil a thlen lai leh lei malsâwmna kan dawn châng chauh ni lo vin, engkimah Pathian hnênah lawm thu kan sawi theih a pawimawh, chu chu amân min duh dân pawh niin a lang. I harsatnaah te, i chânnaah te, i taksa leh rilru natnaah te leh thihna hial chhûngkuaa a lo thlen nikhuaah pawh Pathian hnêna lawm thu sawi hi a pawimawh. I nu leh pa te, i kawppui, i fa te, i chênpuite leh i țhiante hnênah lawm thu i sawi tam tâwk em le?
