TALENT TEHKHIN THU

MATTHAIA 25:14-15
Mi, ram danga kal dâwna, ama bawihte kova, a sumte an hnêna kawltîr ang chu a ni si a. Bawih pakhat hnênah talent nga a pe a, bawih dang hnênah talent hnih a pe a, bawih dang hnênah talent khat a pe a; an tih theih tâwk tûr ang zêl ṭheuhvin a pe a; tichuan, a kal ta a.

Tûn hmain Asia ramah mi hausaten an zin dâwnin an sum peipun tûrin an chhiahhlawhte hnênah an sem ṭhin. He tehkhin thu pawh hi hetiang deuh hi a niin a rinawm. Talent khat hi rângkachak kg.34 bûk vêl nia sawi a ni a. Talent nga kawltu leh talent hnih kawltute chuan a lêtin an tipung ve ve a, talent khat kawltu chuan a tipung ve lo va, nasa taka hau a hlawh ta a ni.

Talent chungchâng sawina hi hun hnuhnung chungchâng sawi chhunzawmna a ni a. Pathianin mi tin hnêna kan tih theih tâwk min pêk a nih anga hmang chhuak lo, uṭawk tûr vawn mai mai hote chuan Lal Isua lo kal leh hunah hau leh pâwn khawthima paih chhuah an bâk a ni. Thilpêk kan dawn ṭheuhte tipung tûr kan ni tih hei hian min hrilh nawn leh a ni e.