THLEI BÎK NEI SUH U

JAKOBA 2:1,9
Ka unaute u, kan Lalpa Isua Krista, Ropuina Lalpa chu ring chungin, mi thlei bîk nei suh u. Amaherawhchu, mi thlei bîk in neih chuan in tisual a ni, Dânin bawhchhetuah a chantîr si che u a.

Pathianah chuan mipa leh hmeichhia, bawih leh a hotu, serhtan leh tan loh pawh ang khat vek kan ni. Jakoba hian kohhranah thlei bîkna a awm a hlau hle. Pâwn lam vântlâng nun hleihneihna chu kohhranah a thlen loh nân hma a la nasa hle.

Tunlai kohhranah pawh hian inthliar hranna a awm loh nân hma kan lâk a ṭûl. Lehkhathiam leh thiam lo, hausa leh rethei, chênna vêng, khua, vun rawng leh a dangte avânga inen hran chu Pathian thu zirtîrna nên a inmil lo. India rama chi inthliarna chuan kristiante a nghawng nasa. Kristaah kan intluktlânna thlîrin thlei bîk nei lovin i awm dial dial ang u.

Kalvari tlâng entlang chuan,
Rethei hausa a thliar lo;
Zir sâng leh zir ngai loten,
Thuhril thuhmun pâr an tlân e.

Pathianin thlei bik neih a duh lo.