KUT DAWH RILRU

LUKA 18:35
Tin, heti hi a ni a, Jeriko khua a thlen dâwnin, mitdel tu emaw kawng sîrah kutdawhin a lo ṭhu a.

Kut dawh awhawm tak leh ngaihsan hlawh tak hi an vâng mai. A chhan chu mahni intodelh loh avanga mite khawngaihna dîltute an nih vâng a ni. Kut dawh chuan thawh chhuah tumna lam aiin mi thawh chhuahsa neih theih dân tûr lamah rilru an pe tam zâwk ṭhin.

Mi tam takin thawhrimna tak tak nêna ei an hmuh laiin mi ṭhenkhat hi chuan thawk rim lova hmuh dân hi kan ngaihtuah dân a ni a. Kan Minister-te leh MLA-te lakah pawh hian thil beisei leh a thlâwna hmuh tum kan ngah lutuk ta deuh em aw? Mahni Biak In kan sak chungchângah te pawh hian hotute lamah te leh kohhran lian zâwk lamah te hian kut dawh kan hreh ta lo lutuk deuh niin a lang. Mi dang ṭanpuina zâra lo sak ṭhat ve viau ai hian mahni phâk tâwka sa mai ṭhinte hi an ngaihsânawm zâwk zelin a lang. Zo fate zîngah kut dawh rilru hi kan um bo tûr zînga mi niin a lang.