KAA ISUA ṬAN

ROM 10:9-10
“I kain Isua chu Lalpa a ni tih i ṭana, mitthi zîng ata Pathianin a kaitho tih i thinlunga i rin chuan, chhandamin i awm ang,” tih hi. Miten thinlungin an ring a, felna an hmu ṭhîn a; kain an ṭan a, chhandamna an hmu bawk ṭhîn a ni.

Lal Isua ringtu kan nihna hi a lang a pau pawha kan lantîr ngam a pawimawh a. Kan thinlunga kan rin hi a ṭul hun apiangah kan kâ pawhin a puang chhuak ngam tûr a ni. Kan thu sawi hian kan nun pawh min kaihhruaina chin a awm ṭhin a. Kan sawi tawh chu tihhlawhtlin ngei pawh kan tum ṭhin.

Sakhaw dang biate kâra khawhar tak leh ṭi taka Lal Isua zuitute tân kaa Lal Isua ṭan a harsa fo ṭhin. Kristian hlang zîngah pawh, a bîk takin ṭhalaite tân Lal Isua zahpui a awl. Mite hmaa Lal Isua hi kan ṭan chuan amah pawhin Pathian hmaah min ṭan ang a, kan zahpui chuan Pathian hmaah min zahpui ve dâwn a ni. Thih thlenga ṭan ngam a va pawimawh êm!