UANG SUH

JAKOBA 4:15-17
Chutichuan, “Lalpan rem a tih chuan kan dam ang a, chumi khami kan ti ang,” in ti tûr hi a ni. Nimahsela, in uannate hi in chhuang zâwk si a, chutiang chhuanna zawng zawng chu sual a ni. Chutichuan, tu pawh thil ṭha tih tûr hriaa ti si lo chu a tân sual a ni.

Kan pian hun, pianna chhûngkua bâkah kan thih hun tûr pawh kan hre lo. Chuvângin chapo leh uang taka ṭawng mai mai tûr kan ni lo. Pathian ṭiha nung tûr kan ni tih hriat reng a pawimawh (Tirh 17:28).

Judate hi sumdâwng mi an ni a, an thil neih avânga chapo a uan mai a hlauhawm êm êm mai a, Pathian an theihnghilh loh nân Jakoba hian fimkhur tûrin a chah a ni. Pathian râwn chung chauh a ti ṭhin tûrin a fuih a ni.

Lalpa, i thu ang ni zêl rawh se,
Ka nunna chungah thu rawn nei la;
Thlarauva khatin Lal Isua chauh,
Ka nunnaah hian a lan theih nân.

Pathian ṭih la, a thupêk zâwm rawh.