THLARAU RAH – HMANGAIHNA

JOHANA 3:16
Pathianin khawvêl a hmangaih êm êm a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zâwk nân.

Pathian hmangaihna a lan fiahna ber chu a Fapa mal neih chhun min pêkah hian a ni a. He hmangaihna hi chu mipa leh hmeichhe inhmangaihna te, chhûngkhat inhmangaihna te, ṭhian ṭha inhmangaihna te leh ram hmangaihna ang a ni ve lo va. Hmêlmate tân pawh a nun pêk theihna hmangaihna a ni.

Hei hi Paula’n a hrechiang êm êm a, I Kor. 13:4-7 ah hetiang hian Pathian hmangaihna chungchâng a rawn sawifiah a – dawhthei, ngilnei, itsîk lo, infak lo, uang lo, che mawi lo lo, mahni hma sial lo, thinur duh lo, sual lam ngaihtuah lo, fel lohnaa lawm lo, thutak lawmpui ṭhin, engkim tuar hrâm hrâm, engkim ring, engkim beisei leh engkim tuar chhuak ṭhin a ni, tiin a sawi a. Hei hi a taka nunpui phawt chuan hotea intihthiam lohna a bo ang a, mite pawh keimahniah hian an rawn luang lût ve tawh zâwk dâwn a ni.