ZILH I NGAI EM?

JAKOBA 5:1-3
Mi hausate u, ngai teh u khai! In chunga hrehawm lo thleng dâwn mêk avâng chuan ṭap ula, chiau vak vak rawh u. In rote a chhe ta a, in puante sûlrûlin a ei zo ta. In rangkachak leh in tangkaruate a tuiêk zo ta; a tuiêk chu in thiam lohzia hriattîrna a ni ang a, in tisa chu mei kan angin a ei ang. Ni hnuhnûngah chuan ro in khâwl khâwm a nih hi.

Bible hian hausakna hi a dem hran lo. Mahse, hausate mawhphurhna chu a sawi chiang khawp mai. Mi hausaten an hlawhfate hlawh an hrênsak tûr a ni lo a ti. I hausak dân hre vektu khân mi dang tân i pêk chhuah kha tâwk a ti ang em? A nei tlêm pawhin ṭhenawmte harsat laia pêk tûr emaw pûk tûr chu kan nei ṭheuh âwm e. Liandova pawhin mim phelin a nau rilṭam ei tûr a pe a, chhuat awng aṭangin a nau ei tûr bapui, bane te a thlâk hram hram a nih kha. Kan kristian hnu hian kan uikawm sawt ni lovin kan thilphal sawt tûr a ni dâwn lo’m ni?

Pe rawh u, tichuan, pêkin in awm ang,
Pêkah Pathian i hnehbân thei lo vang;
Pathianin mihring lei a ba ngai lo,
Malsâwmna hnâr a lo ni si.

Dik taka sawma pakhat pêk hi mi hausate tân nge har mi retheite tân?