ṬAWNGṬAINAIN THIL A TI THEI

JAKOBA 5:16
Mi fel ṭawngṭaina chuan thil nasa tak a ti ṭhîn.

Judaten natna hi sual vânga awm a ni an ti a. Isuan an hriatthiam theih nân Kapernauma zeng a tihdam hma khân, “Ka fa, i sualte ngaihdam a ni tawh e,” a ti phawt a (Mk 2:5). Kan sualte thupha kan chawi chuan ngaidam tûrin Lalpa a inpeih, a rinawm tâwk a ni (1 Jn 1:9).

Tihdama kan awm theih nân kan sual thupha chawi tawn a ṭûl. Pathian hnêna thupha kan chawi chuan amah nên kan inrem ang. Mi dang nên kan inrem theih nân thupha kan chawi tûr a ni.

Kan inṭawngṭaisak ang a, damna kan chang ang. Elija pawh ruah sûr loh nân ṭhahnemngai takin a ṭawngṭai a; kum thum leh thla ruk chhûng ruah a sûr lo a ni. Pathian hnênah a ṭawngṭai leh a, ruah a sûr leh a, leiin rahte a chhuah leh ta a ni. Ṭawngṭai i uar zêl ang u.

Lalpa, min ṭawngṭaitir rawh,
Kan ram mamawhnain min au ve;
Thinlung ṭawngṭaina rimawi tak chuan,
Lei leh vân zawmtîr se,
Lalpa, kan ram tidam leh rawh.

I ṭawngṭai chhân a nih theih nân thupha chawi rawh.