THLARAU RAH – REMNA

EPHESI 2:17
Tin, a lo kalin, nangni hla taka awm ṭhînte hnênah remna Chanchin Ṭha a hrilh che u a, hnai taka awm ṭhînte hnênah pawh remna Chanchin Ṭha a hrilh bawk a.

Remna hi mihring nunhonaah thil pawimawh tak a ni a. Khawvêl sorkar hrang hrang an inpalai tawn ṭhinna chhan pawh remna a awm theih nân a ni. UNO hial a lo dinna chhan pawh khawvêlah remna leh muanna a awm theih nân a ni.

Bawhchhiatna avânga vân leh khawvêl inrem lo chu Isua Krista kraws thisen avângin amah nên inremin kan awm a. Hemi avâng hian kan mihring puite nên pawh kan inrem theih a ṭûl. Remna tel lo chuan nupa nunah te, chhûngkaw nunhonaah te, inṭhenawm khawveênna thilah te, rawngbâwlhonaah te, thawhhona leh nunhona hrang hrangah harsatna a awm ṭhin. Mi dangin min rem theih loh pawhin keimahni lam talin kan rem theih a pawimawh. “A theih phawt chuan nangmahni lam tal, mi zawng zawng nên inremin awm rawh u (Rom 12:18).”