THUPÊK THAR – INHMANGAIH ULA

JOHANA 13:34-35
“Thupêk thar ka pêk che u hi, inhmangaih ula; keiin ka hmangaih che u ang hian nangni pawh inhmangaih ula. In inhmangaih chuan mi zawng zawngin ka zirtîrte in ni tih chumiah chuan an hria ang,” a ti a.

Hmangaihna hi sawi a awl a, sawi a nuam a, kan tuipui tlâng viau mai. Mahse a taka nunpui chu thil har tak a ni.

Pathian hmaa pumkhata insiam nupate pawh a châng chuan hmangaihna a lo dai ṭhin. Kristian tamna Mizoram leh khawthlang ramah nupa inṭhen an tam hle a, a pawi khawp mai. Mahni inchhûng aṭangin inhmangaih zir ila. Kan inhmangaih tih miin an hmuh chuan Isua zirtir kan nih an hre dâwn a ni.

Khawvêlin kan thusawi an awih theih lohna leh min ei lohna chhan chu keimahni an enin hmangaihna chhuak an hmu ṭhin lo a ni. Isua thupêk zâwmin i inhmangaih ang u.

Hmangaihna hrui vuanin,
Thinlung hmun khat puin;
Kristian kan lo insuih khâwm hi,
Vân lam tih dân a ni.

LALPA, mi dang hmangaih thei tûrin min pui rawh.