RINNA DAMPUI

MARKA 5:34
Tin, ani chuan a hnênah, “Ka fanu, i rinna hi i dampui a ni e, thlamuang takin kal la, i natna ata chu lo dam hlen tawh ang che,” a ti a.

Hmeichhia kum 12 lai thi pûta damlo chuan daktawr râwn nân a sum hmang ral tawh mah se, ṭhat lam aiin zual lam a pan a. Isua chanchin a lo hria a. Mipui zîngah zak leh inthlahrung tak chungin a puan hmawr deh ringawt pawh dampui a beisei a ni. Mipui innêk nuaih nuaih kârah Isua puan a va dek thei ta hlauh mai. Chawplehchilhin damna a chang ta a ni.

He hmeichhia hian a tuar rei hmain Isua chanchin hi lo hriain pan nachâng hria se a ṭha tûr! Keini pawh harsatna leh damlohna kan tawhin Isua pan nghal mai nachâng kan hre lo fo mai. A hnên pan ila, kan lungngaihna min lo chhâwkin kan natnate min lo tidam ang.

Kan rinna tinghet la,
Kan rinhlelh tibo rawh;
Khawngaihna thi thei ngai lo kha,
Chhêm alh fo vang che aw.

Rinna leh beiseina nung nên Isua hnên i pan ang u.