NIHLAWHNA THU 3-NA

MATTHAIA 5:5
Thuhnuairawlhte chu an eng a thâwl e; lei hi an la rochung dâwn si a.

Sam 37:11-ah chuan, “Thuhnuairawlhte erawh chuan ram hi an luah ang a … “ tih kan hmu a. Lal Isua sawi nên hian a inzûl hle. Thuhnuairawlh tih hi chiang taka hrilhfiah a har hle a, zaidam, ngilnei leh inngaitlâwm tihte hian a awmzia phawk zo lo mah se a zûl thui viau ang a. Lal Isua vêkin, “Biang lehlama bêngtu che chu lehlam pawh dawh rawh; tin, i puan lâksaktua hnênah chuan i kawr lâk pawh hnial suh …” (Lk. 6:29-31) tia min zirtîrna hian a hrilhfiah mai awm e.

Hetiang mite chan tûra Lal Isuan min kawhhmuh chu ‘lei hi an la rochung dâwn si a’ tih a ni a. Bible lehlin tharah chuan ‘ram chu an la rochung dâwn si a’ tih a ni. Eng pawh ni sela, thuhnuairawlhte chuan he leia nihlawhna an chan bâkah hun hnuhnûngah chanvo ropui tak, ram hlun, tihchhiat theih rual loh an la chang dâwn a ni. An va nihlawh dâwn êm! Chu ram chu chhûngkuain in rochung thei dâwn em le?