NIHLAWHNA THU 5-NA

MATTHAIA 5:7
Mi khawngaih thei takte chu an eng a thâwl e; khawngaih an la hlawh dâwn si a.

Khawngaihna hi Pathian zepui pakhat a ni a. Pathianin a mite a phût pathum zînga pakhat chu ‘khawngaihna ngainat’ a ni (Mik 6:8). J.O. Sanders-a chuan, “Khawngaih hlawh tlâk lote kan khawngaih chauh hian khawngaihna dik a tling a, a phû rêngte chungah a nih chuan khawngaihna ni lovin, felna satliah a ni zâwk,” a ti.

Khawngaihna awmzia chu ‘chhûng lam nun aṭanga mi dangte tuarpui a, an rilru ang pu a, ngaihtuah a, anmahni dinhmuna va indintîrna nun’ hi a ni kan ti thei âwm e. Chutiang taka mi dangte khawngaihna neitu chuan Pathian khawngaihna Kristaa lo lang pawh hi a hrethiam ṭhin. Kan Lal Isua vêkin, “In Pain mi a khawngaih angin mi khawngaih ve rawh u,” (Lk. 6:36) a ti a. Pa khawngaihna dawng tlâk tûrin kan dam chhûng hian mite khawngaihtuah i ṭang ve ang u.