NIHLAWHNA THU 8-NA

MATTHAIA 5:10
Felna avânga tihduhdah tuar hnute chu an êng a thâwl e; vânram an ta a ni si a.

Kristianna hi Kraws aṭanga rawn inṭan a ni a, chuvangin tuarna aṭang lo chuan ringtu nun hian ngaihno a bei tak tak thei lo. Thing leh maute pawh thlipui leh ruahpui te, sik leh sâte an tawrh aṭangin an lo ṭhangin an lo intinghet a, a tâwpah chuan rah duhawm tak an rawn chhuah ṭhin.

Amah kan Lal Isua ngei pawh khân a zuitute tawrh tûr a hmu tlang vek a; chuvangin, a hming avânga hmêlmate tihduhdahna leh chêksawlhna tuartute chuan vânram an chang dâwn a ni tiin an chan tûr ropui tak mai a lo sawi lâwk a. Kohhran a din aṭanga rei lo teah Kristian-te tihduhdahna a lo awm ṭan ta a nih kha. Vawiin thlengin khawvêl hmun hrang hrangah Kristian-te tihduhdahna a la hluar hlê zêl a. Kan ram, India ngei pawh hi Kristian-te thlânmualah a chang ve mêk a ni. A hming avânga tawrh a ṭûl a nih pawhin huaisen takin i hmachhawn ve ang u.