THU DIK I ṬAN NGAM EM?

1 JOHANA 1:8,10
“Sual ka nei lo,” kan tih chuan mahni leh mahni kan inbum a, thutak chu keimahniah a awm lo a ni. “Thil ka tisual lo,” kan tih chuan amah chu dawtheiah kan siam a, a thu pawh keimahniah a awm lo a ni.

Dawt kan sawi hian a thup nan dawt dang emaw thil dik lo dang tih a awl hle. Davida chu Zawlnei Nathana hmanga a sual hriattîr a nih khân a sual a puang a, Pathianin a ngaidam a ni. Petera, Isua thihnaa thih inhuam (Mt. 26:35) pawh khân mal tlat hunah thu dik a ṭan ngam lo (Mt. 26:72) a, vawi thum ngawt a phat. Inchhîrin a ṭap a, Isuan a ngaidam a ni (Jn 18:4-5).

Kristian ka ni, Mizo ka ni tihte hi kan zahpui châng leh thup châng a awm em? Biak ina inneih tlin lo tlin angin i awm em? Thu dik ṭan, mualphopui a ṭul pawha mualphopui ngam kan awm hian Kohhran thianghlimna kan hum a, sual zêp rûk aiin Pathian a lâwm zâwk.

Ṭawngṭaina chhângtu Pathian i nih vângin,
I miten an mamawh an dîl i pe fo;
I fate ṭap leh rûm i lo ngaithla ṭhin,
Thu dik ṭan, thil ṭha ti i ensan ngai lo.

Lalpan thu dik ṭana sual puang tûrin min duh.