SIPAI ZA HOTU
LUKA 7:2-10
Tin, sipai za hotu tu emaw a bawih duh tak a damlo va, a thi lek lek a. Tichuan, Isua chanchin a hriat veleh, a bawih rawn tidam tûra ngên chiam tûrin a hnênah Juda-ho upate a tîr a … a mi tirhte chu inah an haw leh a, bawih chu damin an hmu ta a.
Sipai za hotu hi Jentail, mi rilru puitling leh zau tak a ni a. Judate tân inkhâwmna inte a sak avâng leh an hnam hmangaihtu nia an hriat avângin, Jentail ni mah se, Juda-ten an ngaisâng hle a ni. Amah hi Rom sipai hotu niin, sipai 50-100 inkâr vêl ho ṭhintu a ni.
A bawih pakhat dam loh chungchângah Isua ko tûrin Juda upaho a tîr a. A in an lo thlen hmain a in chu Isua luhna tlâk nia a hriat loh avâng leh amah ngei pawh chu Isua hmu tlâk nia a inngaih loh avângin a ina lût lo tûr leh thu chauh a sawi pawhin a dam mai tûr thu a sawitîr a. A inngaihtlâwmna leh a rinna ṭang kawp chuan Isua kut a tiche lo thei ta lo va; a tidam ta a ni. Lal Isua kut chettîrna tham hian kan inngaihtlâwmna leh kan rinna hi a kal kawp ve em aw?
