PATHIAN AU

SAM 46:1
Pathian chu kan inhumhimna leh kan chakna, Mangan laia ṭanpui var ṭhîntu hnai reng a ni.

Kum 1956 tâwp lam daih tawh kha niin Montgomery bus Boycott hunlai kha a ni a. Zan khat chu ramchhûng mipui dikna vawng himtu Dr. Martin Luther King Jr. chu a muhil thei reng reng lo mai a.

Zanlâi-a telephone rawn rî chuan a ṭhâwng harh a, chu phone chu lâk a hreh êm êm a, hlauhthâwnnain a khah tlat avângin tihian Pathian hnênah a ṭawngṭai ta a, “Tunah hian ka rin hi a dik a ni tih hriat nân ka ding a, mahse ka chauvin ka chak lo hle tih ka inhria e. Tunah hian hlauhthâwnain ka khat a ni. Mipuite chuan keimahah rinna an nghat tawh si a, an tâna nghet taka ka din loh chuan anni pawh an tlusawp vek dawn si a. Tunah hian ka chakna zawng zawngin a kaw tâwpah ka ṭang tawh a ni Lalpa, keimah mai chuan ka hmachhawn ngam ta lo” tiin.

Dr. Martin Luther King Jr. chuan a hnu-a a lehkha ziah leh chu, “Kha hunah khan Pathian nung awmpuina ka chang nasa êm êm a. Chuvangin ka thinlung chhûngah chuan thusawi ka hre thei a ni; ‘Dikna kengin dingchhuak rawh, thu takah chuan awm tlat la, i Pathian chu chatuanin i kiangah a awm ang.’ Ka hlauhthâwnna te chu a kiang ta a, engpawh ka hmachhawn ngam phah ta a ni.” tiin.

Do-na kan tawh chângin Pathian kan au tûr a ni. Ani chu kan mangan laia ṭanpui vartu hnai reng a ni.

Pathian thiltihtheihna kan rin tlat chuan a thlamuanna duhawm tak kan chang ṭhin a ni.