KAWNG CHHÛT NGUN
HAGAIA 1:7
Sipaihote Lalpa chuan heti hian a ti: “In kawngte chu chhût ngun rawh u.”
April 10, 1912 khan Titanic lawng lian chu Southampton aṭangin New York panin a chhuak a, mi 2000 aia tam an chuang a. Newfoundland vâukam an hrût mêk lai chuan California lawng chawlhna aṭangin an lawng chu tizawi tûrin vawi thum lai an rawn phone a. An hmaah vûr tlang lian pui pui a tam avangin khalh zawi tûrin an hriattîr a. Mah se an lawng chu pil thei lo tûr khawpa an ngaih avangin an tizawi duh chuang lo va. An rin loh takin vûr chu a su ta vak mai a. Mi 1500 aia tam an thih phah ta a ni.
Kan Bible-in kan kawng chhût ngun tûrin min hrilh a. Kan zin kawngah hian thihna thlen thei thil a tam êm êm a, chuvangin Lal Isua en chung zêla fimkhur taka kan kal a pawimawh. Mahni duh ang anga zin kawng kan zawh chuan chhiatna râpthlâk tak kan tâwk thut thei vek a ni. Lady Diana-te thih chhan pawh kha an kawng an chhût ngun tâwk loh vâng bawk a ni. Kan kawngte i chhût ngun ang u.
