I HUN TITHIANGHLIM LA

I PETERA 1:16
“Nangni in thianghlim tur a ni, kei ka thianghlim si a.”

Ringtu nuna pawimawh em em chu thianghlim taka kan hunte hman hi a ni a. Kan thinlung leh kan ngaihtuahna te thianghlim taka kan hman chu a hmangaihna tuikhur hlua kan thlen theihna a ni a. Chu nun thianghlim neih a pawimawhzia hriain William Longstaff-a chuan hla mawi takah a rawn phuah chhuak hial a ni.

W Longstaff-a hi Salvation Army dintu William Booth-a ṭhian hnai tak a ni nghe nghe a. Kum 1822 khan Durham, England-ah a lo piang a. Thuhriltu lar, D.L. Moody leh hla phuah thiam hmingthang Ira Sankey te nên pawh inṭhian hnai tak an ni.

He hla ṭha tak hi kum 1882 khan a lo phuah daih tawh a. William Longstaff-a hi Pastor a ni lo a, thuhriltu lâr tak pawh a ni hek lo a, hlaphuah thiam tak pawh a ni lo. Sumdâwng mi, piangthar ṭha tak, rinna kawnga mi serious tak a ni tih chauh hriat a ni.

He hla a phuahna chhan chu, China Missionary, Dr. Griffith John-a chuan Keswick, England-ah thu a sawi a. I Petera 1:16 “Nangni in thianghlim tur a ni, kei ka thianghlim si a,” tih thupui a nei a, he sermon a ngaihthlâk aṭangin W Longstaff-a hian hla mawi leh ṭha tak a lo phuah ta a ni.

Sumdâwng mi a nih angin a hnathawhnaah a practical-a thianghlimna neih tumna rilru lian tak a nei a. Chu chu hlaa rawn phuah chhuakin ringtu tam takte tâna thianghlimna kawnga min kaihhruai theitu hla ṭha tak a lo ni ta a ni.

W Longstaff-a chuan kan hunte tithianghlim tur hian Lalpa kan pâwl fo a ngai a ni tiin a sawi a. Kan Pathian thianghlimin amah anga thianghlim tûrin min duh a, Ani chuan kan hun hlu zawng zawng a tân hmang tûrin min duh thu a sawi bawk.

I hun tithianghlim la, Lalpa pâwl fo rawh,
Amah chu kumkhuain ring tlat zel ang che.