LÂWM CHUNGA RAWNGBÂWL

SAM 100:1-2
Ram zawng zawngte u, Lalpa chawimawiin au chiam rawh u; Hlim takin a rawng bâwl ula, Lâwma zaiin a hmaah lo kal rawh u.

Rawngbâwltute zîngah vui thei tak tak leh phunchiar tak tak a awm ve theih. A chhan leh vâng thuah mi dang an dik loh theih laiin mahni lam inenfiah fo a ṭha. Lei leh vân siamtun a hna thawhpui tûra min duh ve hi a ropuiin a hlû a. Lâwm chunga Lalpa rawng hi bâwl mai tûr kan lo ni reng mai!

Rawngbâwl tûra koh leh thlan ni kher lote pawhin kan vaiin rawngbâwlna tûr kan nei a, chûngte chu thilpêk rawngbâwlna leh ṭawngṭai hi a ni. Hêng kawngahte hian chhûngkaw tinten ṭan kan lâk nasat a ṭûl hle.

Kan tel lo pawh hian Kohhran hi a kal zêl dâwn a, kan thilpêk leh ṭawngṭaina tel lo pawh hian Pathian ram hi a zau zêl tho dâwn. A rawng kan bâwl ve min phalsak hi a ropui lutuk. Lâwm chungin a rawng i bâwl zêl mai ang u.