THLIPUI HAU REH

MARKA 4:41
An hlau ta êm êm a, “He mi hi tu nge ni le! Thli leh dîl lam pawhin a thu an awih hi?” an inti a.

Galili dîl hi Kineret tuifinriat, Tiberia dîl, Genesaret dîl ti tein an sawi bawk ṭhin. He dîlah hian ṭham lâwk vak pawh awm lovin chhim chhak lam aṭangin thlipui a rawn thawk thut ṭhin a, chutiang thli chuan Isua leh a zirtîrte hi a nuai a ni mai thei. A zirtîrten boral mai an hlauh avângin Isua muhil an kaitho chûk chûk a, thlipui leh tuifâwn chu a hauva, a lo reh ta ṭhup mai a ni.

He thiltih mak a thlen hma pawh hian Isuan ramhuai man a tihdam te, mi tam tak a tihdam te, phâr a tihthianghlim te, taksa zeng a tihdam te leh kut zeng a tihdam te zirtîr zînga palite phei chuan an lo hmu tawh a. A thiltihtheihzia lo hre chiang tawh mah se an muanpui chuang lo. Zirtîrte ang hi ringtu tam tak a awm theih. A thiltihtheihzia kan hmuh fo hnuah pawh harsatna dang a lo thlen hian kan zâm leh mai ṭhin. Englai pawhin a thiltihtheihna hi rinchhan tlâk leh thlamuanpui tham a ni tih i hrereng ang u.