MIDANGTE KALTLANGIN

1 JOHANA 1:7
Amah ênga a awm angin ênga kan awm ve erawh chuan, kan inpâwl ho va, A Fapa Isua thisenin kan sual zawng zawng min tlen faisak ṭhîn a ni.

Ringtu nunah chak loh châng leh tlûk châng kan nei ṭhin. Harsatna tam tak tâwkin kan rinna tihnghîna a awm chângte pawh a awm ṭhin a. Thlarau Thianghlim ṭanpuina leh tihchakna mamawhin ṭanpuitu kan mamawh fo bawk.

Lalpaah siamthara kan awm dawnin emaw tihchak tharna kan neih dâwnin kan chungah hnathawh dan hrang hrang a nei ṭhin a. Chu Lalpa remruatna kan chunga a rawn thlen tîr dân chu mihring tân hriatthiam phâk rual loh a ni. Hnathawh dân hrang hrang a neih zîngah midangte kaltlanga Pathian hnathawh hi a tam em em a. Kan mihringpuite hi Lalpan hmanrua-ah a hmang ṭhin a ni.

Irish nutling, upa lam tawh hian harsatna a tâwk a. Mi tam tak hnênah a kal a, mahse a beidawng zêl si a. Chu a harsatna chu Pathian awmpuina a rinhlelh tlat vâng a ni. Ni khat chu a ṭhian hnai tak hian a inah a rawn tlawh a, chu chu remchângah lain a harsatna te chu a lo hrilh a. A inlêng, a ṭhiannu chuan, “Pathian hnênah ṭawngṭai ta che, a khawih theihna tur chein dîlin ṭawngṭai la, a hmangaihna kut ser chuan thlamuannain a vuan tlat zêl ang che” a ti a.

Chu nu chu chawp leh chilhin a ṭawngṭai ta a, Pathian a fak a, chutia a ṭawngṭai lai chuan a dârah kutin a rawn khawih a, “Lalpan min khawih ta e” a ti a.

A ṭhiannu hnenah chuan, “Lalpan min khawiha mahse i kut a ang ka ti hle mai” a ti a. A ṭhiannu chuan, “Ni e, ka kut a nih kha, Pathianin engtin nge rawn khawih che se la i duh, Vân aṭangin a kut rawn tiseiin a rawn khawih che i phût kher em ni? A hnaih ber kut chu a la a, chu chu a hmang ṭangkai ta a nih kha” a ti a.

Lalpa’n hmanraw chi hrang hrang a hmang ṭhin a. A hmanruate chu kan hriatfiah thiam theihna turin finna kan dîl tur a ni.