THLARAU RAH – THUHNUAIRAWLHNA

MATHAIA 5:5
Thuhnuairawlhte chu an chan a ṭha e, ram chu an la rochung dâwn si a.

Bible-a kan hmuh Pathian mi hman tak tak te hi a tîrah chuan thuhnuairawlh tak an ni bîk chuang lo. Mosia te, Petera te leh Paula te ngei pawh an pianpui mihring zia chu paurau ve tak a ni. Pathian Thlarauvin a thuam a, thuhnuairawlh theihna nun a hun takah pêkin an awm mai ṭhin a ni.

Kan Lal Isuan, ‘Thuhnuairawlh leh rilrua inngaitlâwm tak ka nih hi’ (Mt.11:28) a ti a. Hei hi kan entawn tûra min hnutchhiah ropui tak a ni. Thlarau Thianghlim hruaia awm ringtu chuan a neih theih a ni tih pawh kan hriat tlat a pawimawh. Tuten emaw dâwta min puh chângte leh kan huat thu an sawi chângte hian thiamthu sawi leh han ṭawng ve deuh mai a châkawm ṭhin a, chutiang hun takah te chuan thuhnuairawlh nun kan lan chhuahtîr a ṭul ṭhin. Lei rochung tûr chu a huna ngawih theih a pawimawh ṭhin.