NIHLAWHNA THU 1-NA

MATTHAIA 5:3
Rilrua retheite chu an eng a thâwl e; vânram an ta a ni si a.

He lai thua ‘rethei’ tih hian mihring khawsakna thila retheihna leh harsatna lam aiin thlarau lam nuna an retheihzia inhriate lam sawi a tum niin a lang. Bible lehlin thar chuan, “Thlarau lama an pachhiatzia inhriate chu an chan a ṭha e, vânram chu an ta a ni si a.” tiin a dah a, a hmasa aiin hriatthiam a awl mah zâwkin a lang.

Mihringin hriat a mamawh hmasak chu ama duhthu ngeia Pathian dân a bawhchhiatna leh mahni inchhandam thei lo, chhandamtu mamawh a nihna hi a ni a. He thuah mi a chian chuan thlarau lama a dinhmun chhiatzia leh hlauhawmzia a hria a, chhan chhuak thei tur zawngin a ril a ṭamin a tui a hâl ṭhin a. Chu dinhmun aṭang chuan chhan chhuak theitu Lal Isua pawmin vânram neitua siamin a lo awm ṭhin. Mahni ṭha intih vena leh chapona tlâng aṭang chuan thlarau lam ril a ṭam thei lo va, vânram chan a har ṭhin. Miin mahni a inhmuh têt zawh poh leh Pathian lamah a chan a ṭha mai ṭhin a ni.