NIHLAWHNA THU 2-NA
MATTHAIA 5:4
Lungngaite chu an eng a thâwl e; thlamuanin an la awm dâwn si a.
He laia ‘lungngai’ a tih hian Lal Isua ringtu nih avânga tuar a, lungngaite dinhmun a sawi niin a rinawm. Petera’n, “Miin Pathian hriatna avângin tuar loh tûr tuarin, lungngaihna a tuar hrâm hrâm chuan, chu chu Pathian lâwm zâwng a ni si.” (1 Pet.2:19) tia a sawi hian a awmzia a tichiang thei awm e.
Lal Isuan amah ringtuten nêkchêpna leh tihduhdahna an la tawrh tûr thu a hmu lâwk vek a, Thupuanah pawh thih thlenga rinawma awmte hnênah nunna lallukhum khumtîr an nih tûr thu a sawi kan hmu (2:1O). Khawvêl hmun hrang hrangah kan Kristian unauten tihduhdahna an tâwk mêk zêl a. Zirchiangtuten an sawi dânin ni tin khawvêlah Kristian martar 470 an awmin an sawi. Krista hming avânga tuarte zawng zawngte chu thlamuanin an la awm dâwn a ni. Krista hming avâng hian lungngaihna khawp tuarna kan nei ve tawh em le?
