HAUSAKNA LEH NUNNA

1 TIMOTHEA 6:19
Nunna, nunna tak tak chu an vawn theih nân, hun lo thleng tûr atân chuan lungphûm ṭha tak an tâna khâwl khâwm tûrin fuih rawh.

1 Timothea 6:17-18 – Hemi khawvêla hausate hi chapo lo tûr leh, sum rinawm lovah hian an beiseina nghat lova, thil zawng zawng lâwmna tûra tam taka min petu Pathian chungah chuan nghat zâwk tûrin zilh rawh; thil ṭha ti tûrin, thil ṭha tih ngah tûrin, thilphala thawhlâwm peih tûrin.

Timothea hnênah hian Tirhkoh Paula chuan hausak tumte fuihna thu a sawi a. Chutah chuan hausa tawhte chu chapo lo tûr leh engkim Pathian pêk a nihzia leh a hnêna an dawn a nihzia a sawi a. An beiseina leh rinna chu an ro-ah nghat lo tûrin a ti a ni.

Sum leh pai leh hausakna te hi anmahni mai chuan sual (evil) a ni lo va. Engkim mai hi Pathianin kan hlimna tûr leh kan lâwmna tûr te, kan mamawh atâna kan hman tûr tein a siam a, min pe a. Lâwm takin min chantîr a ni.

Mahse, kan thil neihte chu min petu aiin kan hmangaih ṭhin a, kan rilru leh ngaihtuahna zawng zawng kan thil neihah chuan a awm ṭhin a. A pawi hlê. Kan thlarau dinhmun a him zâwk theihna tûrin hralh vek zâwk ila, kan tan a ṭha ang.

Tûnlai khawvêlah eng thil nge awm kan hria, Krista chanchinṭha ni lo, khawvêl bungraw thar chanchin chuan nitin min tuam a, min hel a, min hîp a, chûngah te chuan kan intlânsiak huai huai ta mai a. Mahse, uluk takin i ngaihtuah ang u, chûngte chu boral mai tûr a ni a. Nunna tak tak min pe thei lo a ni. Pathian thu erawh chu nunna a ni a, kumkhua-in a boral .

THUFINGTE 4:23
Thil dang ber aiin i thinlung vêng ṭha rawh, Nunna lo chhuahna a ni si a.