A TAK RAM THLENG LO NUN

EXODUS 8:28
Tin, Pharaoa chuan, “Thlalêra Lalpa in Pathian hnêna in inthawi theihna tûrin ka kaltîr ang che u; amaherawhchu, in kal hla vak tûr a ni lo ve. Mi ngensak ang che,” a ti a.

Israel fate Aigupta aṭanga Pharaoa’n chhuah tîr a phal loh êm êm lai khan, a ram chhûnga an Pathian tâna inthawi chu a phalsak ve tlat. A hnên aṭanga hla taka an kal erawh a phal lo a nih kha.

Hetiang deuh hian hmêlma pa, Setana hian Bible chhiar min phalsak a, mah se nunpui tûrin min phalsak lo. Pathian biak inkhâwm pawh min phalsak a, Thlarau leh tih tak zeta Pa chibai kan bûk erawh chu a phal lo. Ṭawngṭai pawh min phalsak a, Thlarau pâwlna nung nêna ṭawngṭai chu a phal lo. Pathian rawng kan bâwl pawh a phal a, kan buai ve viau thlenga rawngbâwl pawh min phalsak a, mah se thlarau bo chhandam min phalsak lo. Hetianga a hrual vêl mi hi kan ni ang tih hlauh hliah hliah tûr a ni. Setana ramri pêlin kan chhuak ang a, kan Pathian duh dânin a rawng pawh kan bâwl tûr a ni. A tak ram thleng lo nunah hian i awm palh ang e.