NUN THLÂKTHLENG

1 KORINTH 1:18
Kraws thu chu boral mêkte tân chuan âtna a ni si a; keini chhandam mêkte tân erawh chuan Pathian thiltihtheihna a ni zâwk e.

Barack Obama khan America President atâna a in candidate khan ‘change’ tih policy-ah a nei a. A lâr phah mai ni lovin a tlin phah ta hial a nih kha! ‘Change’ tih chu thlâkthleng, ti danglam tihna a ni.

Lal Isua kraws khan khawvêl a rawn thlâkthleng a. Mi sual berte thihnaah mi ṭha ber a thi a, khawvêlin hneh nia an inhriat laiin an khenbeh zâwkin khawvêl a hneh hlauh va, kraws ṭihbaiawm tak chu ringtu tân chuan ‘kan lung kuaitu’ a lo ni a, Kalvari tlâng ‘luruh hmun’ pawh chu tlâng dang zawng zawng aia kan ngainat ber a lo ni ta a ni. Kalvari kraws-a change ropui takin khawvêl a ngam ta ang khan keini pawh Lal Isua kraws avânga kan nun thlâkthlenga a awm hian khawvêl hnehtu kan ni ve mai dâwn a ni. Nun thlâkthleng chu a hlim a, a thlamuang a, a hausa bawk a; tam takin a lo rah chhuak ṭhin. In chhûngkaw nun hi kraws avângin thlâkthleng a ni ve tawh hlawm em le?