AMAN MIN HRUAI ANG

ISAIA 55:9
Vân khi lei aia a sâng zâwk angin, ka awm dânte hi in awm dânte aiin a sâng zâwk si a, ka ngaihtuahte pawh hi in ngaihtuahte aiin a sâng zâwk bawk a ni.

Artui siam dân lehkhabu chhiar chungin artui chu bowl chhûngah tih keh kan tum tawh em? A siam dân i thiam viau te a nih loh a, a siam dân ziak chhiar chunga en lova i tih keh chuan bowl-ah ni lovin dawhkânah te, chhuatah te a baw nuai mai ang. Ei siam thiamte rêng rêngin eng pawh siam dawn ila, a siam dân ngun takin zir phawt a, chumi hnu-a uluk taka siam ṭhin tûr a ni an ti.

Artui siam thiam lo kan awm lêm lo ang, mahse tehkhinna atân kan han hmang mai a. Bible pawhin artui siam dân min hrilh kher lo, amaherawhchu, kan sawi tum nêna phuah rem tak a nih avângin kan han hmang mai a ni e.

Israel faten ramtiam Kanân an thlen dâwnin awmhmun an khuar a, Kanân enthla tûrin Mosia chuan Pathian hriattîr angin hnam 12 thlahtute zînga Puipa ṭhiau a tîr a. An zînga 10 te chuan an ram en chu a ṭha lo lamin an rawn sawi ta si a. Israel thlahte zawng zawng chu Mosia leh Arona chungah an phunnawi leh ta a nih kha. Engtin nge an tih, “Aigupa ramah khân Pathianin min tihlum ṭhen sela aw,” an ti a nih kha.

Enthla tûra kal, Pathian ram pêk tûr Kanân ram chanchin a ṭha lo zâwnga rawn sawi a, harsatna thleng tûr leh a hrehawm dân tûrte rawn sawitute chu Lalpa hmaah hrîin an thi a. Pahnihte erawh chu a ṭha zâwnga an sawi avângin an thi ve ta lo a ni.

Aw le, mihringte hian Pathian lam thlîr lova keimahni lam ngaihdân leh duh dân ringawt kan thlîr a, chuta kan rilru leh ngaihtuahnate kan nghah chuan Pathian hremna kan tâwk ve ang. Pathianin a theih tawh loh kan tihna hmun aṭangin thil min thlîr pui ve lo.

Kan nunin rah chhuah duhawm tak a neih a, a ṭha thei ang bera kan nun a inherchhuah theihna tûra min hruai theihna tûrin kan thinlungte chu amahah kan nghat hmasa fo tûr a ni.