ṬAWNGṬAI THILTIHTHEIHNA (PAULA LEH SILA ṬAWNGṬAINA)

TIRHKOHTE 16:25-26
Nimahsela, zanlaiah Paula leh Sila chu Pathian hnênah an ṭawngṭai a, hla an sa a, mi tângten an ngaithla a; tin, thawklehkhatah lîr nasa takin a lo nghîng a; chutichuan, tân in lungphûmte lam chu a nghîng a; tin, kawngkhâr zawng zawng chu a inhawng nghâl a, mi tin kawl bunte chu a lo inphelh ta vek a.

Paula Missionary zin vawi thumnaah ramhuai a hnawh chhuah thubuaiah Sila nên Philippi lung inah an khung a. Zan laiah ṭawngṭaiin hlate an sa a, lîr nasa tak lo nghîng chuan tân in mai bakah mi tângho kawl bunte pawh a tiphelh ta vek a. Tâng vengtu phei chu a pian thar phah ta nghe nghe a nih kha!

Paula te ṭhian dûn chanchin aṭang hian ṭawngṭaina leh fakna thiltihtheihzia kan hmu chiang hle. Engkimsiamtu leh engkim chunga rorêltu chuan lirnghîngte pawh a duh hun hunah a awmtîr thei a, eng hmanrua atân pawh a hmang thei. Tin, mangan ni chuan mi ko la, ka chhanhim ang che, (Sam 50:15a). Tihtakzetin in ṭawngṭai ve tawh em?