NUN TUNGDING

1 PETERA 3:4
Thinlunga mihring thuhrûk chu, rilru thuhnuairawlh leh nunnêm, silhfên chhe thei lova inthuam ni zâwk rawh se, chu chu Pathian mit hmuhin a hlu êm êm a ni.

Han ngaihtuah teh le! In khawpui chu chhiatrupna engemaw ber, lîrnghîng emaw, leimin emaw, kângmei emaw tuilianin emaw nuai thut ta se la, thil engkim mai chu chhe vek ta se. Sawrkar pawhin a siamṭhatna tûrin kum 10 a ngai ti ta mai se, engtin nge in nun ang?

Kum 1993 khân tuilian avângin Valmeyer, Illinois-ah chu chu a thleng tlat a ni. Mitinte chuan an neih zawng zawng an chân a, neih an nei ta lo a nih kha. Tichuan, an tum ber chu ṭangruala a rang thei ang bera an khawpui siamṭhat leh chu a ni.

Chu hna hautak tak thawk tûr chuan mitinte chuan an nunphung an tidanglam a, an han thawh tak tak tâkah chuan hun reilote chhûngin hna tam tak an thawk hman a, tui a len aṭanga kum 3 chhûngin US Dollar maktaduai 22 man thil an tungding hman hial a ni.

Helen Keller chuan, “Ni tina kan tih tûr aia tam hret hi tih kan tum tûr a ni,” a ti. Chu thu chu Valmeyer mipuite thinlunga awm, an khawpui an tundin lehna tûra an innghahna a ni thei ang.

Aw le, kan nun hlutna hi i ngaihtuah ang u. Tihchhiat a ni tawh em, tihhliam a ni tawh em, dam thei tawh lo tûra tihnat a ni tawh em le?

Kan nunna hi a hlu êm êm a ni tih hriain tisa leh thlarau kawnga kan enkawlna kawngah hian tun aiin i ṭang lehzual ang u. Kan damchhûng hun tawite-ah hian i tungding ang u.

Khawvêl khawpui mah tungding tûra kan ṭang anih chuan khawpui chhe thei lo chang tûrin kan nun kan tungding tûr a ni.