I HMING ZAHAWM RAWH SE

MATTHAIA 6:9
Kan Pa, vâna mi, I hming zahawm rawh se.

Judate chuan Pathian an zah êm avângin a hming lam mai mai pawh an ngam lo va. Thu sâwm pekah, “LALPA i Pathian hming a naranin sawi suh,” tih a awm vâng pawh a ni mai thei.

‘I hming zahawm rawh se’ kan tih hian ‘Pathian zahawmna leh thianghlimna chu fak leh chawisânin awm zêl rawh se’ kan tihna tluk a ni. Sâm phuahtu pawhin, “Aw ka nunna, LALPA chu fak la, ka kawchhûnga awm zawng zawngte u, a hming thianghlim chu fak rawh u,” (Sam 103:1) tiin a lo chham chhuak hial a ni.

Pathian hming zahna hi Zoram Kristiante zîngah hian a bo tain, a narânin kan sawi ta deuh em? a tih theih. Politics khelh nânte pawh hian kan hmang ṭangkai ta deuh em aw? Kan ziakna lamah pawh kan zahna lantîr nân a bulah hawrawppui dah zêl tûr a ni a, pathian dang kan sawi chuan a bulah hawrawptê kan hmang tûr a ni.