PÛKTÎR

THUFINGTE 19:17
Rethei khawngaih hi Lalpa hnêna thil pûktîr ang a ni, I thiltih ang chu a rûl leh ngei ang che.

Mi tam takin, “He khawvel hi kan khualzinna ram mai a ni a, he lei rammi kan ni lo, nun lo la awm tûr atâna inbuatsaihna mai a ni,” an ti ṭhin. Chu chu hre reng mah ila he leiah mahni ṭanghma haiin sum leh pai leh rohlu hrang hrang duhin Pathian duh loh zâwngin kristiante hi kan awm fo ṭhin a ni.

Bible-in, “Vânah, sûlrûl leh tuiêkin a ei chhiat lohnaah, rûkruten an reh pawha an rûk hek lohnaah chuan, in tân rote khâwl khâwm zâwk rawh u,” a tih pawh hi hre reng mah ila ringtute hian vâna ro khâwl khâwm dân kan thiam lo ṭhin.

Vawi khat chu pa pakhat hian a fapa hnênah cheng 100 a pe a. A pa chuan a duh duh dâna hmang tûrin a ti a. Chawlhkâr 2 a liam hnu chuan a pa chuan a pawisa pêk chu engtin nge a hman a zâwt leh a.

A fapa chuan, “Mi ka pûktîr,” a ti a. A pa chuan, “A pung a awm dâwn em ni?” a ti a. A fapa chuan, “Awm dâwn teh reng mai,” tiin a chhâng a. A pa chuan, “Dahkham te an nei em, i chiang maw?” a ti leh a. A fapa chuan mahni inringtâwk tak leh hlim takin, “Ka pa, lungngai suh, a pung awmin ka hmu kîr leh ngei ang. Pawisa chu mi rethei, kan veng mawnga mi kha ka pûktîr a,” tiin a chhâng a. A pa chu a meng kâwk a, “I va han â tak em! Engtin mah an pe lêt leh tawh lo ang che!” a ti ta hrep mai a. A fapa chuan, “Ka pa, Baibulin, ‘Mi rethei khawngaih chuan Lalpa a pûktîr a ni a, a thiltih ṭhat chu a rûl ang’ a tih kha,” a ti a.

A pa chu a inngaihtuah harh a, a lâwm ta êm êm a. A iptea cheng 100 chu a pe leh ta a. A fapa chuan, “Ka pa, ka tih rêng kha! A pung a awm dâwn tih ka hria alawm. Tunah chuan 100% pung ka nei ta e. Mahse hetiang êm êm hian a pung ka hmu hmâ ang tih ka ring lo,” a ti a.

1 TIMOTHEA 6:19
Tichuan, nakin atân ro hlu tak an insiamsak a ni ang a, nunna tak tak chu an chang dâwn nia.