SANGHA MAN TUR AWM LO

MATHAIA 28:19-20
Tichuan, kal ula, hnam zawng zawng zirtîrah siam rawh u; Pa leh Fapa leh Thlarau Thianghlim hmingah chuan baptis ula, thu ka pêk zawng zawng che u pawm tûrin zirtîr rawh u. Tin, ngai teh u, kei, kumkhuain, khawvêl tâwp thleng pawhin, in hnênah ka awm zêl ang,” a ti a.

Sangha man tûrin lên te nên emaw lenkhang te nên lui-ah emaw dil-ah kan kal ṭhin a. Sangha awmna hmun kan den fuh phei chuan kan hlawhtling ṭhin a ni.

Thlasik a ni a, Tom Colins-a chu tui chêng turin swimming pool-ah a rawn kal a. Mak tak maiin tu emaw hian nghakuai a lo khai a.

Tom Colins-a chuan, “Ka pu, eng nge i tih a?” a ti a. Chupa chuan, “Sangha man ka tum,” a ti a. Tom Colins-a chuan, “I fiamthu mai mai a ni lo maw, pool-ah sangha an awm ngai hleinem,” a ti leh a. Mak ti tak chung chuan chu pa chuan, “Sangha te chu tui-ah an awm ṭhin a ni lawm ni,” a ti a. Tom Colins-a chuan, “Awm ṭhin e, mahse swimming pool-ah chuan an awm ngai lo, bâkah thlasik lai a ni a, tui an tilum vek a, awm ngaihna a awm lo,” a ti a. Sangha man tumtupa chu a kal bo ta a. Tom Colins-a chuan chupa chu mi pangngai lo deuh ni-a a hriat avangin a hrethiam hle a ni.

Aw le, kristiante hian thlarau bo kan zawnna kawngah hian swimming pool-a sangha man tumtu ang mai kan nihna lai sawi tûr a awm nual âwm e. Sangha man sa, nghet leh zuala man tuma kan ṭang ang hian Isua Krista Chanchin Ṭha mamawh êm êm, ringtu inpâwlkhâwmna hmun rawn thleng ve thei lo mi tam tak man tûr hian vah chhuah a va ngai tak em.

Tui-a tla mêk ten min au a, mahni inchhanchhuak thei an ni tawh lo. Kan awmna him tak aṭanga kan thlîr mai chuan an boral mai dâwn a, chuvangin kan pênchhuah a ngai a ni.

Sangha man kan duh chuan an awmna hmunah lên kan dêng tûr a ni a. Thlarau bo man tûrin thlarau bo, piangthar lo intite awmna hmun kan pan a ngai a ni.