THUTIAMA RINAWM – JEPHTHA FANU

RORELTUTE 11:39
Tin, heti hi a ni a, thla hnih hnuah chuan a pa hnênah a haw leh ta a, ani chuan chhia a lo chham tawh ang khân a chungah a ti ta a. Mipa tu mahin an pâwl lo.

‘Sunhlu kûngah thei dang a rah ngai lo’ tih ang deuhvin, mi rinawm chuan mi rinawm vêk fa a nei a. Jephthan a fanu hlan a tum avângin a fanuin tlângah a ṭhiante nên a nulât sûnna thla 2 hun han hman a, chumi hnua lo kîr leh a pa hnênah a tiam a; a tiam ang ngei chuan a lo kîr leh ta a ni tih kan hria.

Jephtha fanu hi tûnlaia kan ṭhalai tam tak tân entawn tling a ni. Tlânbo tum se tlanbona tûr a tam ang a, tlangval lakah chesual duh se hun remchâng a ngah ang. Lal Isua ang maiin a pain a hmaa no in tûr huphurhawm tak a chhawp chu hlen chhuaha a awm theih nân a lo kîr leh a, hâlral thil hlanah hlanin a awm ta a ni. Jephtha fanu hian Pathian leh a pa a zah thiam hle mai. Hetiang taka mi rinawm, Pathian leh hringtu ṭih nachang hria ṭhalai hi kan ramin a va mamawh êm!