INTODELH – EI LEH BARAH

TITA 3:14
Kan mite chu tlâkchham an neih ngai loh nân hna ṭangkai thawka inhmang reng tûrin fuih la, an awm mai mai tûr a ni lo.

‘Intodelh’ tih hi ‘mahni kut leh kea ding thei’ tih te, ‘mahni thawh chhuah ringa khawsa thei’ tih te leh ‘mi dang taa innghat lova mahni taa nung leh khawsa thei te pawhin sawi ta ila, a dik thui viauin a rinawm. Intodelh han tih hian engkim neih tum vek leh thiam vek tum lam a kâwk chuang lo va, kan hna leh kan thiam thilte chu engpawh ni se; kan thawh chhuah suma kan chantîr khan ei leh in tûr leh khawsakna a tum zo tûr a ni tih lam a kâwk.

Intodelh hian chhûngkua leh ram a tizahawm a, thiltitheiin a siam ṭhin a ni. Kan huat êm êm rûk rûk leh inrawk te, hel boruak te pawh hi ram intodelhah chuan a tlêm nge nge ṭhin. Kan intodelh nâna ṭul leh pawimawh chu taihmak te, thawhrimte, inrenthiam te, rinawm leh dik te hi a pawimawh. Tlâkchham nei lo tûr chuan awm mai mai loh a pawimawh tia Paula min zirtîr hi a takin i zâwm ang u.