DÎLNA NGAITHLATU

SAM 65:2-3
Aw, ṭawngṭaina ngaithlatu, I hnênah tisa zawng zawng chu an lo kal ang. Khawlohnate chuan mi hneh ṭhîn na a; Kan bawhchhiatnate zawng nangin i tlêng fai ang chu.

Sakhaw dang bia, ṭawngṭai tam ve tho si, ngaithlatu nei si lote hi an khawngaihthlâk khawp mai. Kristian tena muhil ve ngai lo, eng hun pawha kan ṭawngṭaina ngaithlatu kan nei hi a va lâwmawm êm! Khawvêl miliante chu hnaihtu leh thil dîltu an tamin an tân a hahthlâk a, a buaithlâk bawk a, kan duh zawng zawng min tihsak thei lo va, kan ṭhatna tûr min hriatsak vek thei lo bawk. Kan Pathian erawh chu hnaihtu a ngah poh leh a lâwm a, dîlna a hmuh tam leh a lâwm zâwk emaw tih tûr a ni a. John R.Rice-a chuan, “Ṭawngṭaina ngaihthlâk leh chhân hi Pathian pianken a ni,” a ti a.

Pathian hian mi fel leh mi sual ṭawngṭaina te pawh a ngaithla ṭhin a. Thinlung taka ṭawngṭai tluka ngaihnawm Pathian bengah a awm chuang lo. Mittui nêna Pathian kar phei chu a chak hlê ṭhîn.