MESSIA LAL RAM NUN

ISAIA 11:6-9
Chinghnia chu berâmno nên an awm dûn tawh ang a … Ka tlâng thianghlimah rêng rêng chuan intihnat a awm tawh lo vang a, intihchhiat a awm tawh hek lo vang, tuite hian tuifinriat a khuh reng angin, leilung hi Lalpa hriatnain a khat zo vek dâwn a ni.

He lai bung leh châng hi a mawiin a ropui hle. Mi ṭhenkhat chuan vân Jerusalem thar, khawvêl piah lama ringtute chan tûr thilah an dah ṭhin a, chutiang zâwnga sawi atân chuan a uiawm deuhin a lang. Isaia hian Isua Krista (Messia) lal ram chu lei lal ramte nên a inang dâwn lo tih a hmu chiang. Lei lalte ram chu a ruh no no chhuakah tihna ram a nih laiin Messia lal ramah chuan inhmêlmâkna leh intihnat a bo ang a, duh thuhmunin lungrual takin lênza a ni ang a, inrem lote pawh an inrem tawh dâwn a ni tiin a lo sawi lâwk a ni.

Messia lal rama chêng kan nih mêk lai hian kan nupa kârah te, chhungkuaah te leh kan inṭhenawmna boruakah te hian tlâng thianghlim nun kan chênza em? tih hi i inenfiah ang u.