BAWLHHLAWH

BAWLHHLAWH

— Lalremruata
Tahan, Myanmar

Hriselna ṭha kan neihna tûr hian kan chênna leh keimahni ngei pawh kan fai leh thianghlim hi a pawimawh êm êm a, ram changkâng apiang hi an fai emaw tih tûrin hetiang lamah hian ṭan an la ṭhin a ni. Singapore khawpuite phei chu kum 1970 chho daih aṭang tawhin namen lovin an lo thianghlim tawh a, chung avang chuan khawtlâng hrisêlna tehna pawimawh êm êm Infant Mortality Rate (IMR) leh Life expectancy lamah pawh khawvêla hrisêl leh dinhmun ṭha ber an lo ni ṭhin a ni.

Eng nge bawlhhlawh chu?

Thil pakhat a awmna hmun tûra awm lo chu midang tân bawlhhlawh a ni mai a. Bawlhhlawh chu hman tlâk loh leh midang tâna tenawm a ni. Bawlhhlawh chu tuman an hnaih duh lo. A chhan chu an bawlhhlawhna kha an kai chhawng an hlauh vang leh a hrisel loh vang a ni.

Tehkhin nan ‘sam’ hi lu-ah a awm chuan mihring a ti mawi. A chhan chu a awmna hmun tûrah a awm vâng a ni. Kan thil einaah samzai lo awm se a tenawm daih ang. A awmna hmun tûrah a awm loh vang khan tenawm leh bawlhhlawhah a chang a ni mai zâwk.

Tunlaiah mahni awmna hmun tûra awm lo mihring hi engzat tak awm ang maw? Pastor nih chuan a beram te țha taka enkawl kha a hna a ni mai a. Kohhran upa te chu kohhran humhimtu leh zirtîrna dik lo laka vênhim kha an hna nih laia mahni zâwk kohhran zirtîrna nêna milh lo buaipui kan va tam ta êm. Zirlai ni si mahni zirlai ngaihsak lova thildang buaipui pawh tam tak an awm. Sawisen a ni lo. Kan awmna tûra kan awm loh khân midang tân bawlhhlawh kan lo ni ta chu a ni mai. Ṭhenkhat lah mipa/minu ngaizawnga buai em em lah bo lo. Khawvêl hi zawng a hahthlâk a ni e. Midang tân bawlhhlawh kan nih khân kan inkârah hlimna a thlen lova harsatna tam tak a thlen zâwk a ni. Relationship a ṭhat loh chuan Isuan khawvêla êng chhuak tûra thu min pêk kha kan thawk thei ta țhin lo. Kohhran Upa mahni kohhran doctrine helsantu te kha kohhran mipui tân bawlhhlawh an ni mai a, chu chuan thil țha lo tak a hringchhuak ṭhin. Pathian thuchah sawi ve ṭhin mahse mipui bengah a lût tak tak thei ṭhin lo. Zirlai mahni zirlai ngaihsak lo kha school hruaitute tân bawlhhlawhah a chang a, ngaihsak an ni tawh lo a. An mahni zâwk lungawi loah an țang leh lawi si.

Kan chhehvelah bawlhhlawh a tam hian mihring kan hrisêl thei lo a. Chutiang chiah chuan Kohhranah bawlhhlawh a tam hian Kohhran mite kan chauvin kan ngui țhin. Mahse bawlhhlawha kan ngaih ṭhin tamtak hi chu siamṭhain hmanrua ṭha takah chher theih a ni. Tehkhin nân plastic bûr bawlhhlawh bâwma awm hi chharin silfai ila, a chhûngah lei emaw, thil dang pawh thunin in ropui tak sak theih a ni. Facebook lamah pawh an hman țangkai dân video hmuh tûr tam tak a awm. Mihring te pawh midang tân bawlhhlawh ni mah ila insiamṭhain hmanrua ṭha takah kan chang leh thei a ni.

Midang tân bawlhhlawh ka ni em tiin kan inenfiah reng hi a ṭul reng a ni

avatar
  Subscribe  
Notify of
Copyright © 2017-2020 Our Daily Bread Mizo.
Privacy Policy