THU SAWM PÊK 5-NA

EXODUS 20:12
I nu leh i pa chawimawi rawh; tichuan, Lalpa i Pathianin ram a pêkah che hian i dam rei dâwn nia.

Nu leh pa chawimawite hlawh tur chu dam rei a ni. Nu leh pa chawimawi dân pawimawh tak chu an zirtîrna ngun tak leh dawh thei taka ngaihthlâk a, an thu zawm hi a ni. Hetiang lam hawi fuihna hi Thufing-ah kan hmu tam hle (1:8,9; 4:1-4; 6:20; 7:1-3; etc.).

Nu leh pate hian zah, chawimawi leh ngaihhlut hi an phû takzet a. Enkawl leh duat ngai êm êma saruaka lo piang kan nih lai aṭanga min chawi liantute an ni a. Hetiang a nih avang hian zah, chawimawi leh ngaihhlut an phû hliah hliah a. Thawh chhuah pawh nei dêr si lovin kan han vin ve ngawt ṭhin hi chu mâwl vâng a ni ber mai. Nu leh pate avânga lehkhate pawh hi zir thei kan ni a. A thawk chhuaktu nu leh pate ‘in mâwl lutuk’ tih chînte hi mahni mâwl vâng a lo ni zâwk ṭhin. Hnam changkâng leh upa apiangin nu leh pate an zah thiam tih i hria ang u.