MIN HAN SIAMSAK PHAWT LA

1 LALTE 17:13
Tin, Elijan a hnênah, “Hlau suh; i sawi ang chuan va ti ta che; amaherawhchu, chumi chuan chhang tê tak tê mi han siamsak phawt la, chu chu mi rawn lâk la, chumi zawhah chuan i tân leh i fapa tân i la siam dâwn nia.

Ṭâm laiin Zarephath hmeithai hi thilpêkah a duai lo hle mai. Mi tam tak chuan, ‘ni tin kan ei khawpin chaw min pe ang che’ kan ti chung hian kan la neih ve nual pawhin mi dang tâna pêk chhuah kan harsat ṭhin.

Khawkhên avângin Kerith luite pawh a kang chat hial a, Zarephath hmeithai hnênah hian Pathianin a tîr ta a ni. Hmeithai kher a thlang hi mak danglam tak chu a ni. Amaherawhchu, Pathianin mi tu pawh a hmang thei a ni tih hi kan hriat tel a ṭha khawp mai.

Mahni mamawh aia mi dang mamawh pe hmasa phaltu hmeithai aṭang hian zirlai ropui tak kan zîr chhuak thei. He khawvêl, ‘ka’, ‘keimah’ leh ‘ka ta’ tihna hmunah hian mi dang kan dah hmasak thiam a va ṭûl êm! Chu chu malsawmna hnâr a ni.

LALPA, mi dang dah hmasak min zirtîr rawh.