NAUPANG THILPHAL

JOHANA 6:8-9
Tin, a zirtîrte zînga pakhat, Simon Petera unau Andria chuan a hnênah, “Barli chhangpêr panga leh sangha pahnih nei mipa naupang pakhat hetah a awm; nimahsela, mi hêng zozai zîngah hian chûng chu eng tham nge ni ang?” a ti a.

Mipui sângnga hrai khân chhiar telloh hmeichhia leh naupang kha patling zawng zawng ai khân an ṭhahnem zâwk pawh a ni mai thei.

Mipui khati zât zîngah khân he naupang lo pawh eitûr keng chu an awm furin a rinawm. He naupang mi rethei tak hi mi dangte tân a thil neih ui lova pe phal awmchhun a ni. [Barli chhang hi mi retheite ei tâwk, ran chawa an hman ṭhin a ni.] He naupang hian a neihchhun a ui lo va, mi tam tak tlaina leh Pathian ropuizia lanna a lo ni ta.

Kan thil neih emaw thiamna emaw Pathian hnêna kan hlan hian Pathianin nasa taka tipungin malsawmnaah a chantîr thei. Pêkna rilru chu kan neih tam leh tlêmah a innghat lo, kan thinlungah a innghat zâwk a ni.

Ka sum zawng i tân ka pe,
Nawi khat mah ka ui lo ve;

Kan neih zawng zawng Isua kan hlân phal em?