SOLOMONA

1 LALTE 11:1-2
Solomona chuan Pharaoa fanu chang lo pawh hnam dang hmeichhe tam tak – Moab te, Amon te, Edom te, Sidon te, Hit-ho hmeichhiate a hmangaih a; chûng hnamho chungchâng thu chu Lalpan Israela thlahte hnênah, “Anmahni pâwl suh ula, anni pawhin pâwl che u suh se, an pathiante lamah in thinlung an hruai kawi ngei dâwn si a,” tiin a lo sawi tawh rêng a. Chûngho chu Solomona chuan hmangaihnain a vuan tlat a.

Solomona Pathianin a duh dîl tûra a tih pawhin damreina te, hausaknate dîl lovin Pathian mite chung a rorêl thiamna a dîl a, chu chuan Pathian a tilâwm a; finna bâkah hausakna leh ropuina a pêk belh chhah bawk a ni.

Solomona hi fing viau mah se la, a pa Davida angin Pathian kawng ruatte zawh tluan chhuak lovin LALPA a chungah a thinur ta a ni. Keini pawh Pathian kawng kan pênsan chuan kan dâi sual ngei ang. Pathian ṭih mi, ama hnên lama min hruai thei bulah awm i tum tlat ang u.

Ṭhian sual chu hawisan la, ṭawngkam tha lo nên,
Isua lam en fo la, a hruai zêl fo ang che.

LALPA, suala min hruai kawi thei kan nunah kan seng luh loh nân min ṭanpui ang che.