HERODA CHHECHHAM

MARKA 6:25-26
Tin, ani chu hmanhmawh takin lal hnênah chuan a va lût ta nghâl a, “Thlêngin Baptistu Johana lu i mi pêk nghâl ka duh a ni,” tiin a dîl a. Tin, lal chu a lungngai ta êm êm mai a; nimahsela, a chhechhamte leh a chaw kîlpuite avâng chuan a lo hnial duh lo va.

Herodain a unau Philipa nupui Herodi a neihsak chu huai takin Johana’n a sawisel a. Chuvângin a man a, tân inah a khung a ni. Heroda piancham lawmnaah Herodi fanu lâm thiam avângin a dîl apiang pêk a tiam a. A nu chuan Johana a huat êm avângin a lu dîl tûrin a lo ti a.

Baptistu Johana chu mi fel leh thianghlim tak a ni tih hre mah se, ama ṭawngkam ngei avângin a duhloh zâwng tih a ngaih phah a ni. Esauva pawh chhechhama chaw vawi khat eiin a fatîr nihna a hralh a. Josua pawhin a ngaihtuah chian loh avangin Gibeon mite zuah tûrin thu a thlun pui a. Jeptha pawh thutiam âtthlak tak LALPA hmaah a siam a, a fa neihchhun a chân phah. Thutiam mai mai (Thuh. 5:4-5) hi lungngaihnaa min hruai lûttu a ni thei tih i hria ang u.

LALPA, thutiam mai mai lo tûr leh kan thutiamte hlen tûrin min pui ang che.