AHABA

1 LALTE 21:25
A nupui Jezebeli fuihpawrha Lalpa mit hmuha thil ṭha lo ti tûra inpe, Ahaba ang rêng rêng hi tu mah an awm lo.

Ahaba chuan LALPA mit hmuhin thil ṭha lo tak a ti ṭhin a. Zidon ho lal Ethbaal-a fanu Jezebel-i, uire leh dâwi chîng mi nupuiah a nei a. Aseri zâwlnei mi 400 lai mai pawhin Jezebeli dawhkânah chawhlui an kil ve ṭhin. Lalpa’n Karmel tlânga a thiltihtheihna a lantîr khân Baal zawlnei mi 450 lai mai chu Elijan a thahtîr vek a, Jezebel-i thinrim leh vaukhânna hlauvin Sinai tlângah a tlân chhiat phah hial a ni.

Ahaba chuan a in bul lawka Naboth-a grêp huan chu a dîl a, anin a lo phal lo a. A nupui Jezebel-i remruatnain Naboth-a chu lungin a den hlumtîr ta mai a.

Ahaba ang hi kan ni fo mai ṭhin; mahni’na tih duh chiah loh pawh mi dangte hmanga thlentîr pawi tih lohna kan nei thei. A titu leh a phaltu chungah mawhphurhna a awm tih i theihnghilh lo ang u.

Kristian, kal fîmkhur rawh, hlauhawm a hnai,
Hemi khawvêla i awm chhûng zawngin;
Setana thlêmnain i vêl a dâp,
Setana hneh nân i Lalpa dîl rawh.

Ahaba angin thil ṭha lo ti tûrin mi kan nawr em?