ṬANPUITU

HEBRAI 2:18
Amah ngei chuan thlêmna tâwkin a lo tuar tawh avângin, thlêmna tâwkte chu a ṭanpui thei a ni.

Lal Isua hi thlêmna tinrêng tâwk tawh, sual erawh chu sual lo a ni a. Mi a hrethiamin mi a ṭanpui thei tih i ring ngam ang u (Heb. 4:15-16).

Bible-ah Isua chanchin chipchiar taka ziak lan a awm lo va, a chanchin ziah loh chhûng hian thil tam tak a tawngin thlêmna chi hrang hrang pawh a tâwk ngei ang. Bible-in a sawi hi chu pawm hmiah mai ila a hahdamthlâk maiin a lang. ‘A ni thei dawn em ni?’ tih ai chuan Bible-in a sawi chu a dik i ring phawt mai teh ang.

Mimal, chhûngkuain thlêmna kan tawh ang te hi amah ngeiin a lo tawrh tawh a ni. Isua hnênah engkim thlen ila min ṭanpui peihin ṭanpui min duh reng a ni. Ṭanpuitu ṭha Isua ngei hi i pan ang u.

Isu, LALPA, min ṭanpui rawh,
Min puih loh chuan ka nung thei lo;
Chhandamna kim chu min pe la,
LALPA, min pui ang che.

LALPA, min ṭanpuitu, i hnên kan rawn pan e.