PATHIAN AWMZIA TILANGTU THLARAU THIANGHLIM

KOLOSSA 1:16-17
Amahah chuan engkim siam a ni a, vâna awmte, leia awmte nên, hmuh theihte, hmuh theih lohte nên, lalṭhutphahte pawh, rorêlnate pawh, lalnate pawh, thuneihnate pawh; engkim ama siam a ni, ama ta tûr bawka siam a ni; tin, ani hi chu engkim awm hmain a awm rêng a ni, amahah chuan engkim a ding ho bawk a ni.

Pathian chu engkim awm hmaa awm, bul leh tâwp nei lo Pathian a ni a. Vâna thil awmte leh leia thil awm zawng zawngte hi ama siam vek a ni. In pawh mihringin a sak loh chuan amahin a lo awm ngawt thei lo va, a satu mihring vângin a lo awm ṭhîn.

Lei leh vâna thil awm zawng zawngte pawh hi siamtu Pathian vânga lo awm a ni a. Thil siamtu chuan neitu nihna a nei ṭhîn angin Pathian chu a thil siamte neitu leh enkawltu a ni bawk. Ni leh thla leh arsi te vawiin thlenga mumal taka an kawnga an la kal te; nipui, fûr leh ṭhâl a pângngaia a la inher chhuak reng te leh thing leh mau, thlai leh ran sate hian Bible hi awm lo pawh ni se Pathian a awmzia a lantîr tho tho a ni.