CHHUNGKAW MAICHAM

LEVITICUS 6:13
Maichâmah mei a nung reng ang a; a mit tûr a ni lo.

‘Chhûngkaw maichâm’ kan tih hi ‘chhûng inkhâwm’ kan tih ṭhin nên thil thuhmun a ni a. Chhûngkuaa Pathian biak hona a ni. Eng emaw chen aṭang khân chhûngkaw maichâm neih hi kan uar tlâng ta viau mai a, thil lawmawm tak a ni.

Kan taksain chaw a mamawh ang bawk hian kan thlarau pawhin chaw a mamawh a. Kan thlarau mamawh tihtlaina ṭha tak chu chhûngkaw maichâm neih ṭhin hi a ni. A hlutna hmu laklawh tawh ho chuan an bansan phal tawh lo. Taksa damna atâna lo hmang thlengin sawi tûr an awm zêl mai! ‘Chhûngkuaa Pathian hmâa kûn tlâng thei chu an nui tlâng thei ṭhin’ tih leh ‘Chhûngkuaa Lalpa pâwl hman lo khawpa mahni hnaa buai ṭhinte hi an thih dâwn dârkâr thlenga inchingfel hman lovah an ṭang duh khawp nia!’ an tih ṭhin hi hrereng ila. Tûn aṭang hian Chhûngkaw Maichâm mei mit lova nei tûrin kan puanven i sawi chhîng ang u.